ليش لوحدك -رحيم المالكي

ليش لوحدك من غير جناز ------- ياهو الغسلك ويغمض العيون

غريب بنص محطة ووادم اجانب ------ وهلك عنك بعيد شلون يدرون

اليموت بنص هلة تتهدل اهدال ------- عليه امة وخواتة ايطيحن امتون

اشوفك وحدك وانت الگبل جان -------- الجبل والساتر ابسدك يلوذون

ملك موتك استعجل لو توانيت -------- ترد لارض الوطن جا هسة مدفون

دليني بجوازك خاطر اقراه ----------- واشوف اشكد الك بالغربة مسجون

من وحشة الغربة لوحشة الموت ------ وشربت الوحشتين ابفرد ماعون

عليك اتعاين امك هلبت اتعود ------ وضعنك ما رجع من بين الا ضعون

عدمن ودعتها وجيت ليجاي ------- وعليك اتناشد اليرحون ويجون

حكها شتدري عنك وانت معذور ----- صرت خشبة اعلى خشبة هنانة مرهون

تريدك عون يمها بتالي الليل ------ وهسة انت ضعت وتريدلك عون

وحدك تنخة روحك جنك اتكول ------ هلي يا من ضيعوني شلون ينسون

المثلك ما يموت واهلة تنساه ----- العراقي انت الاصيل وتنسي اشلون

جنت بيرغ علىالهامات مرفوع ------ وجبينك منحنة وغيرك يدنگون
المثلك ما يظل من غير جناز ------ النخل يمشي وياك وية اليشيعون

الينظرولك خطية ومتت مسكين ----- الف فدوة لحياتك كون يرحون

المن جابتك للغربة رجليك ------ ومتت لا ناعية ولا ناس يبچون

تگلي العوز اكلك انت غلطان ----- العراق بخير بعدة ولسة مامون

صحيح الجوع كافر لليمر بيه ------ وانة مجربة واعرفة شلون ملعون

حافي وساوماني وكلت ما ابيع ------ وشلت غيرة هلي العشرين مليون

اثبت لا تهزك رعشة العوز ------- الشدايد صم صبر وتعدي وتهون

العراقي شما تمر بيه الملمات ------ جلد عالنايبة وبالصبر مدهون

انة يا صاحبي راجع للعراق ----- واسولف قصتك لليهجرون

واگلهم نهر ذله ورة طريبيل------ وانا خايف عليكم لاتشربون